Tge acturs stattan davos il DEP?
Confederaziun
La Confederaziun s'engascha activamain per realisar la Strategia eHealth Svizra. Quai fa ella oravant tut cun elavurar la Lescha federala davart il dossier electronic dal pazient (LDEP). Las basas giuridicas ed ils standards per il DEP valan en tut la Svizra.
La Confederaziun è responsabla per la legislaziun sco er per ils servetschs da consultaziun centrals. Quests servetschs cumpiglian per exempel la glista dal DEP cun tut las persunas spezialisadas dal sectur da sanadad che sa participeschan al DEP e cun tut las gruppas da talas persunas. Uschia chattan las pazientas ed ils pazients lur persuna spezialisada dal sectur da sanadad e pon conceder ad ella il dretg d'access.
Chantuns
Sco instanzas responsablas per il provediment da la sanadad guardan ils chantuns che lur urden giuridic respectiv correspundia a la legislaziun federala surordinada e che purschiders dal DEP possian s'etablir en lur regiun. Per part sustegnan ils chantuns er l'installaziun ed il manaschi dals purschiders dal DEP en lur intschess da provediment.
eHealth Suisse
Cuminaivlamain han la Confederaziun ed ils chantuns installà il post da cumpetenza e da coordinaziun «eHealth Suisse» che coordinescha dapi l'onn 2008 las lavurs en connex cun il DEP e cun la colliaziun digitala en ils fatgs da sanadad.
Purschiders dal DEP
Ils purschiders dal DEP èn cuminanzas organisatoricas tecnicas da persunas spezialisadas dal sectur da sanadad e da lur instituziuns. Els porschan il dossier electronic dal pazient sur ina plattafurma, administreschan ils dossiers e collian las persunas spezialisadas dal sectur da sanadad cun lur pazientas e pazients.
Editurs da l'identitad electronica
Suenter ch'ils editurs da meds d'identificaziun electronica renconuschids han examinà l'identitad da las pazientas, dals pazients e da las persunas spezialisada dal sectur da sanadad, emettan els lur identitad electronica. Per mintga access al DEP conferman els al purschider dal DEP l'identitad da la persuna che fa la dumonda.
Link intern: Glista dals editurs da meds d'identificaziun electronica
Link extern: Dapli infurmaziuns davart l'identitad electronica (en tudestg)
Providers da las plattafurmas dal DEP
Ils providers da las plattafurmas èn ils purschiders tecnics che elavuran ed administreschan las plattafurmas dal DEP tenor las pretensiuns da la lescha federala. Els procuran per ils aspects tecnics da las plattafurmas.
.svg){kind=logo}