Co sa sviluppa il DEP vinavant?
I vegn a durar in tschert temp fin ch'il DEP è pli derasà. El è numnadamain dapli che mo in ulteriur servetsch. Il barat d'infurmaziuns tranter las pazientas ed ils pazients e las persunas ch'als tractan è ina midada da cultura.
In DEP che vegn sviluppà cuntinuadamain
Il DEP vegn sviluppà vinavant e meglierà pass per pass. Il cumenzament vegnan barattads cunzunt documents en il format da PDF, però bainbaud vegni er ad esser pussaivel d'integrar formats interactivs en la plattafurma dal DEP. Quai permetta per exempel a medias e medis sco er ad apotecras ed apotechers d'adattar la survista da la medicaziun actuala da lur pazientas e pazients directamain en il DEP. Sche adina dapli persunas avran in DEP ed adina dapli persunas che las tractan èn prontas da deponer ils documents ils pli impurtants en il dossier, daventa il niz dal DEP adina pli grond. La finamira duess esser quella, che tut las persunas spezialisadas dal sectur da sanadad che tgiran ina pazienta u in pazient, han da tut temp access a las medemas infurmaziuns. Uschia daventa la circulaziun da las infurmaziuns en in tractament meglra e pli effizienta.
In maletg ideal per il proxim futur
En il clip (en tudestg) actualisescha l'apotecra la survista da la medicaziun en il DEP da dunna Wegmüller, en il qual il medi da chasa ha gia fatg endataziuns. Per che quai saja pussaivel, duessan las datas pudair vegnir registradas en il DEP en moda structurada e standardisada – pia en moda che differents computers las pon elavurar raschunaivlamain ed automaticamain. Oz n'è quai savens anc betg il cas.
Per l'ina chaschunan quai las sotfwares da tractament che n'èn savens betg bunas da far quai. Actualmain è il DEP praticamain l'unic format da datoteca che po vegnir barattà tranter l'ospital, la chasa da tgira, la pratica dal medi e.u.v. Per l'autra è il barat standardisà da las infurmaziuns davart la medicaziun cumplex e na vegn betg anc elavurà.