Ils custs per ina commembranza varieschan tut tenor il purschider dal DEP, la grondezza da l'instituziun da sanadad, in eventual sustegn dals chantuns u da federaziuns professiunalas. Dumandai directamain ils purschiders dal DEP d'As suttametter in'offerta.
As participai al DEP cun paucs pass
Per pudair As participar al DEP stuais Vus tscherner in purschider dal DEP, numnà er cuminanza (da referenza) e percurrer sia procedura d'annunzia.
Sa participar al DEP en 6 pass
Dumondas frequentas en connex cun avrir in DEP
Sco persuna spezialisada dal sectur da sanadad avais Vus access al DEP da Vossas pazientas e da Voss pazients via il portal d'internet u directamain via Voss sistem d'infurmaziun. Qua vegnis Vus a savair tge che Vus stuais far per As colliar cun il DEP.
Sistems primars numnan ins ils sistems electronics ch'ins dovra per administrar ils rapports medicals u las actas medicalas d'in ospital, d'ina pratica da medi, d'ina apoteca u d'in terapeut. Las infurmaziuns arcunadas là servan sco basa primara per prender las decisiuns medicinalas.
Il DEP cuntegna infurmaziuns endatadas d'ulteriuras persunas involvidas en il process da tractament che pon sustegnair Vossa lavur.
Per pudair lavurar cun il DEP da Vossas pazientas e da Voss pazients stuais Vus laschar registrar Vossa instituziun da sanadad e Voss persunal tar Vossa cuminanza (da referenza) ed As decider per ina da las suandantas pussaivladads da colliaziun.
Colliaziun via il portal d'access da Voss purschider dal DEP:
Questa soluziun na pretenda nagina integraziun tecnica. Vus importais ils documents a maun en il DEP. Questa pussaivladad è adattada sco soluziun transitorica u per organisaziuns che administreschan mo paucs dossiers electronics dal pazient.
Colliaziun sur Voss agen sistem d'infurmaziun:
Questa soluziun pretenda ina integraziun tecnica e succeda sur Voss agen sistem d'infurmaziun. Vus pudais arcunar las datas automaticamain en il DEP senza stuair midar tranter duas interfatschas. Vus pudais er arcunar e reutilisar las datas dal DEP en Voss agen sistem IT. Uschia avais Vus da tut temp access a las infurmaziuns relevantas da Vossas pazientas e da Voss pazients durant il temp dal tractament. La premissa per ina tala «integraziun approfundada» è che Voss partenari d'informatica fetschia las adattaziuns necessarias da Voss sistem d'infurmaziun. Questa soluziun è adattada per organisaziuns che lavuran regularmain cun il DEP.
Las cuminanzas (da referenza) ston porscher a Vus ina scolaziun per utilisar il DEP.
Sin questa pagina d’internet pudais Vus er empustar in pachet da scolaziun e chattais bler material d'infurmaziun ed in questiunari online cun dumondas da controlla.
Purschiders dal DEP
Il dossier electronic dal pazient (DEP) è ina fusiun da singuls projects autonoms. Persunas spezialisadas dal sectur da sanadad e lur instituziuns sa reuneschan en ina cuminanza tecnic-organisatorica. Questas cuminanzas vegnan numnadas tenor la lescha federala «cuminanzas da referenza» u «cuminanzas». Ellas èn ils «purschiders dal DEP».
Commembras da las «cuminanzas» pon daventar mo persunas spezialisadas dal sectur da sanadad. Da las «cuminanzas da referenza» percunter pon far part tant las persunas spezialisadas dal sectur da sanadad sco er las pazientas ed ils pazients che pon avrir tar quellas lur DEP persunal.
Cuminanzas e cuminanzas da referenza pon vegnir fundadas a moda decentrala en las regiuns da provediment, per exempel en in chantun, ma er da plirs chantuns ensemen. Da quellas pon daventar commembras tut las persunas spezialisadas dal sectur da sanadad e lur instituziuns (p.ex. ospitals, chasas da tgira, praticas da medi u servetschs da la spitex).
Il sectur da sanadad stat en la cumpetenza dals chantuns. Cunquai che las raits da provediment vegnan organisadas sin plaun chantunal, èn sa sviluppads plirs projects autonoms. Ensemen furman quels il project dal DEP.
Las persunas spezialisadas dal sectur da sanadad e lur instituziuns èn sa reunidas en cuminanzas tecnic-organisatoricas. Questas cuminanzas porschan il DEP a la populaziun ed a tut las persunas spezialisadas dal sectur da sanadad. Ellas vegnan er numnadas cuminanzas da referenza e cuminanzas.
I dat damai plirs purschiders dal DEP ch'èn activs sin plaun chantunal, regiunal u naziunal. Ils purschiders dal DEP ston percurrer ina procedura da certificaziun. Quella attesta als purschiders dal DEP ed a lur partenaris ch'els adempleschan las premissas tecnicas ed organisatoricas per garantir la segirezza da las datas, ma er ch'els èn cumpatibels in tranter l'auter.
In grond dumber da purschiders signifitga er che las datas davart la sanadad n'èn betg arcunadas a moda centrala en ina suletta cuminanza. Quai è in avantatg per la segirezza da las datas.
Las persunas spezialisadas dal sectur da sanadad u las instituziuns da sanadad che vulan u ston sa participar al DEP, pon tscherner libramain lur cuminanza (da referenza), premess ch'ils chantuns dettian ad ellas la libertad d'eleger. Er pazientas e pazients pon tscherner libramain il purschider dal DEP e midar quel da tut temp.
Il DEP funcziuna en l'entira Svizra, er sche Vossas pazientas e Voss pazients fan part d'in auter purschider.
Entant che las pazientas ed ils pazients pon s'annunziar mintgamai mo tar in purschider dal DEP, pudais Vus sco persuna spezialisada dal sectur da sanadad esser annunziada sur differentas instituziuns da sanadad tar pli che mo in purschider dal DEP certifitgà. Quai po far senn, sche Vus lavurais en duas instituziuns che n'han betg il medem purschider dal DEP – per exempel in'ortopeda che maina in'atgna pratica e lavura il medem mument sco media accreditada en in ospital.
Identitad electronica
Saja quai persunas spezialisadas dal sectur da sanadad, pazientas e pazients u substitutas e substituts: tut las persunas che vulan consultar il DEP ston s'identifitgar a moda segira. Per quai duvrais Vus ina identitad electronica.
Link extern: Vegni a savair pertge che l'identitad electronica renda Voss DEP pli segir
L'identitad electronica na vegn betg administrada dals purschiders dal DEP, mabain d'organisaziuns spezialisadas. Er quellas ston percurrer ina procedura da certificaziun tenor la Lescha federala davart il dossier electronic dal pazient (LDEP).
Link extern: Tge signifitga la certificaziun? (en tudestg)
Mintga purschider dal DEP accepta differentas identitads electronicas. Tge identitads ch'i dat e tgeninas che Voss purschider dal DEP accepta, vesais Vus en questa survista:
La procedura per survegnir ina identitad electronica variescha tut tenor il purschider dal DEP e l'editur da l'identitad electronica.
Da princip pudais Vus crear Vossa identitad electronica per il DEP sco suonda:
1. Tscherni Voss purschider dal DEP.
2. As infurmai tge identitads electronicas che Voss purschider accepta e tgeninas che vegnan eventualmain purschidas da Voss chantun.
3. Giai sin la pagina d’internet dals editurs da l'identitad electronica ed empleni il formular.
4. Laschai verifitgar Voss identitad. Quai po succeder sur in post responsabel da Voss chantun u online.
Tscherts purschiders dal DEP pussibiliteschan da crear l'identitad electronica, cura che Vus avris il DEP, tar auters stuais Vus percurrer duas proceduras separadas. Il meglier As infurmais Vus directamain tar il purschider dal DEP che Vus avais tschernì.
.svg){kind=logo}