Il DEP en furma concisa

Tenor la Lescha federala davart il dossier electronic dal pazient (LDEP) èn ospitals acuts, clinicas psichiatricas, clinicas da reabilitaziun, chasas da tgira, chasas da parturir ed a partir dal 2022 er las praticas da medias e medis admessas da nov obligads d'introducir il DEP. Ultra da quai ston las persunas spezialisadas dal sectur da sanadad arcunar infurmaziuns impurtantas en il DEP, uschespert che lur pazientas e pazients han avert in DEP.

Dapli infurmaziuns (en tudestg):

Link extern: Wer muss ein EPD anbieten?

Per tut las autras persunas spezialisadas dal sectur da sanadad è la participaziun al DEP facultativa. Quai concerna per exempel medias e medis admess avant l'onn 2022, apotecras ed apotechers, persunas che prestan servetschs da la spitex u fisioterapeutas e fisioterapeuts.

Grazia al DEP han ellas in access pli simpel a las infurmaziuns relevantas per il tractament. Il barat d'infurmaziuns direct promova la coordinaziun e la cooperaziun tranter las persunas spezialisadas dal sectur da sanadad.

Per la promoziun da la sanadad e la prevenziun po il DEP avair avantatgs. Las infurmaziuns davart la prevenziun individuala pon vegnir arcunadas en il DEP e fatgas accessiblas, per exempel ils resultats d'ina controlla preventiva u las valurs da la pressiun dal sang. Il DEP rinforza er ils dretgs e las cumpetenzas en dumondas da la sanadad da las pazientas e dals pazients. Grazia al DEP survegnan ellas ed els access als pli impurtants documents senza stuair dumandar quels explicitamain da lur persuna spezialisada per il tractament. Uschia pon las pazientas ed ils pazients sa participar al process da tractament a moda pli activa ed autonoma.

La cooperaziun interprofessiunala è oz ina realitad per la gronda part da las persunas spezialisadas dal sectur da sanadad. Adina dapli partidas da differentas gruppas spezialisadas èn participadas ad in tractament. Gia per maldispostadads pli pitschnas pon p.ex. esser participads al process da tractament ina media u in medi, in'apotecra u in apotecher ed er ina terapeuta u in terapeut. Dapli persunas spezialisadas dal sectur da sanadad ch'èn involvidas, e pli impurtant ch'igl è da collavurar a moda coordinada ed effizienta.

Cun il DEP sco plattafurma unitara per il barat da datas na ston las persunas spezialisadas dal sectur da sanadad betg pli far dumondas da controlla telefonicas u laschar trametter ils documents mancants. Quai reducescha ils sbagls da transmissiun. Grazia a las datas standardisadas en il DEP ed als formats da barat structurads pon las differentas instituziuns da sanadad barattar e leger questas datas senza ch'i dettia incumpatibilitads da software. Dapli persunas spezialisadas dal sectur da sanadad, pazientas e pazients che sa participeschan al DEP e meglier che sa laschan barattar las infurmaziuns per in tractament effizient.

Il DEP cuntegna copias dals documents che valan sco «relevants per il tractament». Quai èn infurmaziuns impurtantas per l'ulteriur tractament da las pazientas e dals pazients tar autras persunas spezialisadas dal sectur da sanadad, en cas urgents u per il tractament punctual tar in'autra persuna spezialisada dal sectur da sanadad. Sco persuna spezialisada dal sectur da sanadad pudais Vus per exempel arcunar en il DEP la glista da medicaziun, in rapport da tgira u in rapport da sortida da l'ospital. Las pazientas ed ils pazients da lur vart pon er arcunar documents en il DEP, per exempel la disposiziun da la pazienta u dal pazient, l'attest da donaziun d'organs u anteriuras diagnosas.

Documents d'exempel da persunas spezialisadas dal sectur da sanadad:

• glista da medicaziun actuala
• rapport da sortida da l'ospital suenter in'operaziun
• rapport da tgira da la spitex
• attest da vaccinaziun actualisà
• infurmaziuns davart allergias enconuschentas
• diagnosas radiograficas

Sche Vus sco persuna spezialisada dal sectur da sanadad actualisais ils documents existents, restan las anteriuras versiuns vinavant disponiblas en il DEP.

Dapli infurmaziuns (en tudestg):

Link extern: «Behandlungsrelevante Informationen» im EPD

Il DEP registrescha mo las infurmaziuns davart la sanadad d'ina pazienta u d'in pazient ch'èn relevantas per autras persunas spezialisadas dal sectur da sanadad e per l'ulteriur tractament.

Ultra dal DEP maina la persuna spezialisada dal sectur da sanadad er vinavant in rapport medical cumplet da sias pazientas e da ses pazients. Quel cuntegna bler dapli infurmaziuns ch'il DEP, sco per exempel las notizias persunalas u ils quints per la cassa da malsauns.

Dapli infurmaziuns (en tudestg):

Link extern: Unterschied elektronische Krankengeschichte und elektronisches Patientendossier

Vus sco persuna spezialisada dal sectur da sanadad decidais tge infurmaziuns ch'èn impurtantas per l'ulteriur tractament tar autras persunas spezialisadas dal sectur da sanadad. Las pazientas ed ils pazients pon dentant er pretender che tscherts documents na vegnian betg arcunads en lur DEP.

La persuna responsabla per la tgira depona per exempel il rapport da sortida da l'ospital en il DEP, per che las collavuraturas ed ils collavuraturs da la spitex sappian tge ch'ellas ed els ston resguardar en connex cun la tgira d'ina pazienta u d'in pazient.

Per avair access ad in DEP stuais Vus esser annunziada u annunzià tar in purschider dal DEP certifitgà e disponer d'ina identitad electronica segira.

Il pli impurtant è dentant il dretg d'access. Quel survegnis Vus directamain u indirectamain da la pazienta u dal pazient che dat persunalmain l'access a Vus u a la gruppa da persunas spezialisadas dal sectur da sanadad, da la quala Vus faschais part. Il dretg d'access è adina limità.

Las pazientas ed ils pazients pon midar da tut temp tant ils parameters dals dretgs d'access sco er il stgalim da confidenzialitad da singuls documents.

Tras la Lescha federala davart il dossier electronic dal pazient (LDEP) na datti naginas midadas en connex cun l'attribuziun da las cumpetenzas e cun la dumonda da responsabladad.

Cun il DEP avais Vus a disposiziun ina nova funtauna d'infurmaziuns. Per l'obligaziun da diligenza existenta na mida quai nagut. Sco fin ussa decidais Vus en la situaziun concreta, tge infurmaziuns che Vus As procurais, nua che Vus las tschertgais e sche Vus las vulais resguardar per Vossa lavur. Il DEP n'è betg concepì sco plattafurma per archivar tut ils documents e tut las infurmaziuns da las pazientas e dals pazients. Mo documents ch'èn necessaris per l'ulteriur tractament duain vegnir arcunads en il DEP. Perquai duessas Vus far stim da deponer en il DEP mo infurmaziuns relevantas per il tractament. Per far quai n'èsi betg necessari da dumandar mintga giada il consentiment da la pazienta u dal pazient. Sche Vossa pazienta u Voss pazient ha in DEP, pudais Vus partir dal fatg ch'ella u el è d'accord che documents vegnan arcunads là. En il cas singul po ina pazienta u in pazient dentant pretender ch'ils documents davart il tractament actual na vegnian betg arcunads en il DEP.

I valan las reglas usitadas en connex cun dumondas da responsabladad

Las dumondas da responsabladad èn regladas en ils artitgels 41 e 97 ss. DO sco er en las leschas spezialas respectivas (guardar er art. 1 al. 4 LDEP). Il DEP na stgaffescha nagina situaziun che n'è betg cuvrida tras las reglas vertentas. Tras la Lescha federala davart il dossier electronic dal pazient (LDEP) na datti naginas midadas tar l'attribuziun da las responsabladads e la dumonda da responsabladad. La dumonda, sche las obligaziuns da diligenza èn vegnidas violadas sin basa d'in sbagl, sto adina vegnir giuditgada tenor las circumstanzas en il cas singul concret. En quest connex èsi decisiv, sch'ina persuna spezialisada dal sectur da sanadad ha prendì ina decisiun giustifitgabla en la situaziun da quella giada sin fundament da las infurmaziuns existentas e sin basa da las pussaivladads diagnosticas u terapeuticas. Tgi che maina ina documentaziun da la pazienta u dal pazient, sto quintar gia oz che terzas persunas sa fidian da las indicaziuns ch'èn cuntegnidas là. Ella u el po vegnir fatga responsabla u responsabel envers las pazientas ed ils pazients, sche quellas e quels vegnan donnegiads en il rom dal tractament tras terzas persunas, perquai che la documentaziun è incumpletta u cuntegna faussas indicaziuns.

Link extern: Ulteriuras infurmaziuns davart la responsabladad en connex cun l'utilisaziun dal DEP (en tudestg)

Link extern: Mussavia pratic da la FMH: Basas giuridicas en il mintgadi medicinal (en tudestg)

Las dumondas da responsabladad èn regladas en ils artitgels 41 e 97 ss. DO sco er en las leschas spezialas respectivas (guardar er art. 1 al. 4 LDEP). Il DEP na stgaffescha nagina situaziun che n'è betg cuvrida tras las reglas vertentas. Tras la Lescha federala davart il dossier electronic dal pazient (LDEP) na datti naginas midadas tar l'attribuziun da las responsabladads e la dumonda da responsabladad. La dumonda, sche las obligaziuns da diligenza èn vegnidas violadas sin basa d'in sbagl, sto adina vegnir giuditgada tenor las circumstanzas en il cas singul concret. En quest connex èsi decisiv, sch'ina persuna spezialisada dal sectur da sanadad ha prendì ina decisiun giustifitgabla en la situaziun da quella giada sin fundament da las infurmaziuns existentas e sin basa da las pussaivladads diagnosticas u terapeuticas. Tgi che maina ina documentaziun da la pazienta u dal pazient, sto quintar gia oz che terzas persunas sa fidian da las indicaziuns ch'èn cuntegnidas là. Ella u el po vegnir fatga responsabla u responsabel envers las pazientas ed ils pazients, sche quellas e quels vegnan donnegiads en il rom dal tractament tras terzas persunas, perquai che la documentaziun è incumpletta u cuntegna faussas indicaziuns.

Dapli infurmaziuns (en tudestg):

Link extern: Responsabladad en connex cun l'utilisaziun dal DEP

Link extern: Mussavia pratic da la FMH: Basas giuridicas en il mintgadi medicinal

Il DEP vegn sviluppà vinavant e meglierà pass per pass. Il cumenzament vegnan barattads cunzunt documents en il format da PDF, però bainbaud vegni er ad esser pussaivel d'integrar formats interactivs en la plattafurma dal DEP. Quai permetta per exempel a Vus sco media e medi, sco apotecra ed apotecher d'adattar la survista da la medicaziun actuala da Vossas pazientas e da Voss pazients directamain en il DEP. Sche adina dapli persunas avran in DEP ed adina dapli persunas che las tractan èn prontas da deponer ils documents ils pli impurtants en il dossier, daventa il niz dal DEP adina pli grond. La finamira duess esser quella che tut las persunas spezialisadas dal sectur da sanadad che tgiran ina pazienta u in pazient, han da tut temp access a las medemas infurmaziuns. Uschia daventa la circulaziun da las infurmaziuns en in tractament meglra e pli effizienta.

Link extern: Das EPD im Alltag